KOMPARASI.ID,(Hulondtalo) -Ti Bupati Prof. Nelson Pomalingo, malopodungga Tombilu Odu’olo ode Penjabat Gubernur Gorontalo Ismail Pakaya.
Odu’olo mondto Ta’uwa Lo Lipu Lo Limutu beyto lo timu’atayi, sababu ti Pj. Gubernur Ismail Pakaya malongohi upango ode tuwango lipu to Kab. Gorontalo, berupa subsidi Lo Pale to Patali lo Kayubulan mola To Limutu.
Tombilu beyto matiluyunatayi Li Bupati Nelson to’u mayilapato lo dembeta woli Pj. Gubernur Ismail Pakaya to’u lolilinga patali Lo Kayu Bulan mola to Limutu dulahu Hamisi 10 Ramadan 1445 H (21/03/2024).
To patali beyto, Ti Pj. Gubernur woli Bupati Nelson Pomalingo malopo’opatata haraga lo bahan pokok.
Modungohe mola lo’iya Li Bupati Nelson, Pamarendta Provinsi waw Kabupaten Lo Hulondtalo paralu da’a mo’awota waw mopoliyatu lo program, sababu perekonomian to hulondtalo butiye 35 persen to Kab. Gorontalo.
Sababu uwito, ti Bupati Nelson Pomalingo malopodungga odu’olo ode Pamarendta Provinsi to mimbihu malopodungga lo imato malongohi upango meyambo subsidi haraga lo pale to Kab. Gorontalo.
To situasi masatiya wonu modungohe mola lo’iya li Bupati Nelson, ta to uliya Lo Bilulo’a lo Pamarentda to’u nga’amila lenggota paralu da’a mo’awota mopotuwawu lo pikirangi waw lo kalaja alihu rakyati mo’otoduwo piyohu.
To uwewo liyo ma’o, to delomo Patali Lo Kayubulan beyto, Ti Bupati Nelson malodungohe mola lo’iya meyambo aspirasi Lo tahepotaliya lo’uponula to patali beyto to mimbihu uponula limongoliyo dilamala sababu bo ngoidi tamotali.
Lo dungohe mola aspirasi beyto, ti Bupati Nelson lo tombangayi, deboli liyo ma’o yito masatiya mangohundtuwa tahepotaliya lo’u ponula to bihu dalalo waw to bambu’a to kakambunguwalo.
Sababu uwito Pamarendta Lo Kabupaten Gorontalo to wakutu membidu butiye mamohimbunguwa mopoliyatu lo pikirangi alihu tahepotaliya Lo’uponula to Papataliyalo debo mo’otoduwo tilapulo. (AM)
